Синевир — лем едно значѣня з вецерох! Иншы значѣня см. Синевир (варианты).
Синевир — озеро в Закарпатской области Украины. Плоха 0,07 км2, глубина до 24 м. Лежить в Горганах в котлинѣ, котря ся вытворила горскым ссувом.
В озерѣ жиють пстругы, але лапаня заказане. Озеро окружене смерековыма лѣсами, приступаючыма ку самому берегу.
Пстругы Синевирского озера суть шпециалного подвида, котрый ся одличуе од рѣчковых пстругох скоршым ростом и векшов плодностьов. В року 1954 областна новинка писала, же тот подвид пструга надзвычайно цѣнный про племенне пестованя.
Од року 2004 озеро под числом 1400 записано до списка храненых мокрин Ramsar яко Народный Парк Синевир. В регистрачном опису меджи храненыма видами зазначеный племенитый рак Astacus astacus и флора, котра е хранена подля Червеной книгы Украины.
Главный вызнам озеро мать яко туристичный объект. Синевир — едине в области озеро односно великого розмѣра, его плоха около 7 га, середня глубина 15 м.
В року 1924 добрый знатель Подкарпатской Руси др. Йиржи Крал, пише о озерѣ Ozero во вышцѣ 989 м под горов Ozirňou (1500 м), нияк не споминаючи о его туристичном вызнамѣ. Под назвов Sinivir споминать лем село.
В року 1956 совѣтска география познавала озеро под назвов Синевирске озеро, циже озеро, котре находить ся при с.н.п. Синевир.
| „ | Закарпатя мать 32 озера, але найвеце
познате Синевирске озеро, положене на сѣверовостоку Межгорского
района во вышцѣ 987 м. Сюды доста рѣдко загостюють туристы, а
шкода, бо се озеро з прозрачнов водов, невеличкым малебным
островком посерединѣ, зарамоване в густу зеленяву — едно з
найкрасшых в Закарпатю.
|
” |
Од конця 1950-х озеро, по выставбѣ доброй дорогы и пансионата, ставать ся атрактивным туристичным объектом. Про туристох додавали новы а новы службы и объекты, была выгадана примитивна легенда о взнику озера, выготовлены деревяны рѣзбы, зображуючы поставы Синѣ и Вира, «геройох» той легенды. Туристика давать заробок многым мѣстным обывателям. Назва Синевир в сучасности вяже ся з озером, а не з селом, як то было колись. Туристичный объект Siněvirské jezero барз популарный и у чешскых туристох.
